वीरगञ्ज – भूमिसुधार तथा मालपोत कार्यालयका प्रमुख जनकपुरमा घुससहित पक्राउ भएका छन् ।

मालपोत कार्यालय धनुषाका निमित्त प्रमुख प्रशासकीय अधिकृत सुनिल कुमार झालाई अख्तियार दुरुपयोग अनुसन्धान आयोग बर्दिवासको टोलीले ५ लाख रुपैयाँ घुससहित पक्राउ गरेको हो ।

जनकपुरधाम उपमहानगरपालिका-२ भानुचोकस्थित रहेको चिया पसलबाट उनलाई अख्तियारले पक्राउ गरेको छ ।

एक सेवाग्राहीबाट जमिन पास गराउने सम्बन्धमा घुस मागेको गोप्य सूचनाको आधारमा बर्दिवासबाट खटिआएको अख्तियारको टोलीले उनलाई पक्राउ गरेको जनाईएको छ ।

झाले सेवाग्राहीलाई चिया पसलमा ५ लाख रुपैयाँसहित आउन भनेका थिए । कालो प्लास्टिकमा बेरिएर राखिएको ५ लाख रुपैयाँ सहित उनलाई बिहान करिब साढे ८ बजे पक्राउ गरिएको अख्तियार दुरुपयोग अनुसन्धान आयोग बर्दिवासको कार्यालयले जनाएको छ ।

झालाई प्रक्रिया पुरा गरी बर्दिवास लाग्ने तयारी भइरहेको छ ।