युवा माझ लोकप्रिय कलाकार हुन् र्‍यापर लाहुरे अर्थात् आशिष राना । उनलाई कास्की प्रहरीले केही महिना अगाडि लागुऔषध प्रयोग गर्दै गर्दा पक्राउ गर्‍याे । उनी ५६ दिन जेलमा बसेर छुटेका छन् । उनै लाहुरे अब भने लागुऔषधविरुद्धको अभियानमा निस्कने तरखरमा छन् ।

नजिकै आउन लागेको अन्तर्राष्ट्रिय लागुपदार्थ तथा अवैध तस्करीविरुद्धको दिवसकाे अवसरमा लाहुरे अभियानमा अगाडि बढ्ने भएका हुन् । जिल्ला प्रहरी कार्यालय कास्कीले लागुऔषध रोकथाम तथा नियन्त्रण गर्ने उद्देश्यसहित सप्ताहव्यापी सचेतना कार्यक्रम आयोजना गर्ने कार्यक्रममा उनी अभियन्ताका रूपमा अगाडि देखिने छन् । असार ६ गतेदेखि पोखरामा विभिन्न ठाउँमा अभियान सञ्चालन हुनेछ ।

अहिले पनि जिल्ला प्रहरी कार्यालय कास्कीको हिरासतमा रहेका लागुऔषधविरुद्ध मुद्दाका धेरैजसाे कारोबारी नै भएका कास्की प्रहरी प्रमुख एवम् प्रहरी उपरीक्षक रमेश थापा बताउनुहुन्छ । लागुऔषध कारोबारीलाई हदैसम्म कारबाही र अन्जानमा फसेकालाई परामर्शबाट सुधार गर्ने प्रयासअनुसार नै कार्यक्रम गर्न लागेको उहाँकाे भनाइ छ । आशिष राना पनि यसको एक उदाहरण भएको उहाँले बताउनुभयाे ।