काठमाडौं । नेपाल प्रहरीको केन्द्रीय अनुसन्धान ब्युरो महाराजगन्जबाट खटिएको टोलीले बैंकिङ कसुर मुद्दाका एक फरार प्रतिवादी पक्राउ गरेको छ ।

पक्राउ पर्नेमा दोलखाको भीमेश्वर नगरपालिका–१, चरिकोट घर भई हाल काठमाडौंको बूढानीलकण्ठ नगरपालिका–१३, माइक्रोपार्कनजिकै बस्ने ४४ वर्षीय रमेशकुमार श्रेष्ठ रहेका छन् ।

उच्च अदालत पाटनको २०७९ पुस २९ गतेको फैसलाले बैंकिङ कसुर मुद्दामा १० दिन कैद र १३ लाख ५० हजार रुपैयाँ जरिवाना सजाय ठहर भई फरार रहेका उनलाई ब्युरोको टोलीले सोमबार काठमाडौंको कोटेश्वरबाट पक्राउ गरेको हो ।

पक्राउ परेका श्रेष्ठलाई फैसला कार्यान्वयनका लागि ललितपुर जिल्ला अदालतमा पेस गरिएको प्रहरी प्रधान कार्यालयले जनाएको छ ।