काठमाडौं । स्वास्थ्य तथा जनसंख्या मन्त्रालयले दादुरा रोगको संक्रमण बढ्दै गएको बताएको छ । दादुराको संक्रमण बढ्दै गएकाले यसबाट बच्न सतर्क रहन मन्त्रालयले आग्रह गरेको छ ।

दादुराबाट सतर्क नरहे मृत्युसमेत हुनसक्ने मन्त्रालयले स्पष्ट पारेको छ । “दादुरा रोग लाग्नबाट होस् नपुर्याए अकालमै ज्यान जान सक्छ,” स्वास्थ्य मन्त्रालयले भनेको छ ।

दादुरा रोग लागेमा झाडापखाला लाग्ने, कुपोषण हुने, कान पाक्ने, निमोनिया हुने, आँखामा समस्या भई अन्धोपन हुनेजस्ता समस्या देखिन सक्छ । मस्तिष्क ज्वरो आउने, कम्पन हुनेजस्ता जटिलताका कारण दादुराबाट मृत्यु पनि हुन सक्ने मन्त्रालयले जनाएको छ ।

दादुरा भएको शंका लाग्ने लक्षणहरू देखिएमा तत्काल स्वास्थ्य संस्थामा गएर उपचार गर्न स्वास्थ्य मन्त्रालयले सुझाव दिएको छ ।