रुकुम पश्चिम : रुकुम पश्चिमको विभिन्न स्थानमा असिना पानी परेको छ । सोमबार बेलुका परेको असिना पानीको कारण किसानले लगाएको गहुँ, तोरी र फलफूल खेतीमा क्षति पुगेको किसानहरूको भनाई छ । त्रिवेणी गाउँपालिका ७ राजकोटकी रामसरा खड्काले भर्खरै लगाएको गहुँ खेती असिना पानीले बगाएको बताए । उनले ठुलो मात्रामा परेको पानीले धान खेती ढल्याउदै गरेका र गहुँ खेती लगाउँदै गरेका किसानलाई मर्कामा पारेको बताए ।

अर्का किसान शङ्कर डाँगीले गहुँ, तोरी र फलफूल खेतीमा क्षति पुगेको जानकारी दिए । उनले गहुँ र तोरी बगाएको र असिनाले सुन्तला, कागती झारेको बताए । गाउँमा अधिकांश किसानले भर्खरै गहुँ छरेका थिए । असिना पानीले अन्य स्थानमा धान र पराल ढल्याउदै गरेका किसानलाई समस्यामा पारेको छ । असिना पानीले त्रिवेणी गाउँपालिका, मुसिकोट नगरपालिका र चौरजहारी नगरपालिकाका वडा नम्बर १३, १४ को क्षेत्रमा बढी क्षति गरेको बताइएको छ । क्षतिको यकिन विवरण भने सङ्कलन हुन सकेको छैन ।