काठमाडौं । एक अनुभवी र युवा सहकारी अभियन्ता नवमैत्री बचत तथा ऋण सहकारी संस्थाका अध्यक्ष किरण बर्तौला पछिल्लो समयदेखिएको सहकारी समस्याको निराकरणका लागि नीतिगत सम्वोधनको आवश्यकता रहेको बताउछन् । झन्डै एक दशक सहकारी क्षेत्रमा व्यतित गरेका वर्तौला नेपाल बचत तथा ऋण केन्द्रीय सहकारी संघ (नेफ्स्कुन)को आसन्न साधरण सभाका उम्मेदवार हुन ।
पौस ७ र ८ गते काठमाडौंमा हुने संस्थाको ३२ औं साधारण सभाले आगामी चार वर्षका लागि नयाँ नेतृत्व चयन गर्दै छ । उक्त साधारण सभामा समग्र सहकारी क्षेत्रलाई व्यवस्थित मर्यादित र विश्वासिलो बनाउने अभियानमा होमिनका लागि नेफ्स्कुन संचालक समिति सदस्य पदका लागि उमेद्वारी दिने निचोडमा पुगेको बर्तौलाले बताएका छन् । आफ्नो उम्मेदवारी घोषणा गर्दै बर्तौलाले विगत ८ वर्षदेखि सहकारी क्षेत्रमा आबद्ध भई सहकारी क्षेत्रमा आफूले गरेको अनुभव र भोगाईहरुलाई संस्थागत रुपमा योगदान दिने लक्ष्यसहित उम्मेदवारी घोषणा गरेको बताए ।
सहकारी क्षेत्रमा देखिएका बिद्यमान समस्या सतही रूपमा मात्र बाहिर आएको तर नीतिगत रूपमा सम्बोधन हुनुपर्ने धेरै ठाउँ रहेकाले त्यसका लागि पहलकदमी गर्ने खुड्किलोका रूपमा नेफ्स्कुनमा आफ्नो उमेद्वारी रहेको बताउदै सहकारी ऐन २०७४, सहकारी नियमावली २०७५ जारी भएपश्चात ऐनको कार्यान्वयन पक्ष निकै फितलो रहेको र कार्यान्वयनका पक्षधरहरू सहकारी नियामक निकाय, सहकारी अभियन्ता र सम्पूर्ण सहकारीकर्मीहरूको निष्कृयताले हालको समस्या उत्पन्न भएको हुँदा यसको समाधानका लागि भूमिका खेल्ने प्रतिवद्धतासमेत व्यक्त गरेका छन् । बर्तौलाले व्यवस्थापन संकायमा स्नातकोत्तर गरेका छन् । कानुनी विषय र लेखा सम्बन्धमा पनि विशेष दक्खल राख्ने उनी आफ्नो संस्था नवमैत्री साकोसको संचालनमा पनि अब्बल देखिएका छन् ।
सहकारी ऐन २०७४ ले दिएको व्यवस्था अनुरूप कर्जा सूचना केन्द्र र ऋण असुली न्यायाधीकरणको स्थापना भई सहकारी संचालनमा सहजीकरण गरिनुपर्ने धारणा विभिन्न फोरमहरूमा राख्दै आएका बर्तौलाले सहकारी ऐन २०७४ को पूर्ण रूपमा कार्यन्वयन भई संस्था संचालनमा सहजीकरण हुनु पर्ने धारणा व्यक्त गर्दछन् । सहकारी ऐनको पूर्ण कार्यन्वयन गर्दै कर्जा लगानी र असुलीमा सहजीकरण, बचतकर्ताको बचत सुरक्षण जस्ता संवेदनशील विषयमा केन्द्रित भई काम गर्ने आफ्नो लक्ष्य रहेको बताउँदै अवसर पाएमा सक्रिय भई सहकारी क्षेत्रको समुन्नतिका लागि समर्पित रहने घोषणा गरेका छन् ।