काठमाडौँ । अभिनेत्री मिरुना मगर पछिल्लो समय फिल्म ‘रङ्गेली’का कारण मिडियामा छाइरहेकी छन् । यही फागुन २५ गतेबाट सार्वजनिक प्रदर्शनमा आउने फिल्म ‘रङ्गेली’मा उनको ‘जुनकिरी’ नामक चरित्र छ । फिल्ममा आफूलाई दर्शकले थारु गेटअपमा ‘जुनकिरी’ चरित्रमा देख्न पाउनेछन् । त्यो आफ्नो अहिलेसम्मकै फरक अभिनय रहेको उनी बताउँछिन् । जुनकिरी चरित्रमा अभिनय गरिरहँदा आफूले  समाजका धेरै पात्रहरूको प्रतिनिधित्व गरेको अनुभव भएको उनले स्मरण गरिन् ।

‘जुनकिरी एकदमै स्वतन्त्र र आफ्नै बाटोमा हिँडिरहेकी पात्र हो । यस चलचित्रका खलपात्रहरु जो ‘ब्ल्याक एण्ड ह्वाइट’ नभईकन ‘ग्रे’ जोनका छन्, उनीहरूको यात्रामा उसले आफैलाई एकदमै कठोर तरिकाले डिल गर्छिन् त ? यो चलचित्रमा हेर्न पाइन्छ’, मिरुना भन्छिन् । फिल्मको स्क्रिप्ट पढ्दादेखि नै जुनकिरीको चरित्र विकासमा ध्यान दिएकी बताउने उनले समाजमै भएको पात्रहरूलाई हेरेर उनीहरूको यात्रा, भावना र भोगाइलाई  वास्तविक हिसाबले चलचित्रमा प्रस्तुत गरेको बताउँछिन् । उनी चलचित्रमा जुनकिरीको सम्बन्ध अन्य चरित्रसँग ‘चाखलाग्दो’ र ‘जटिल’ रहेको समेत मान्छिन् । चलचित्रमा महिला कलाकारलाई प्रेमको पात्रको रूपमा मात्र चित्रण गरिने गरिन्छ । तर यो चलचित्रमा आफ्नो चरित्र प्रेम भन्दा माथि रहेको उनको धारणा छ ।

मिरुना आफूले चलचित्रमा निर्वाह गरेको ‘जुनकिरी’ चरित्रको आयामबाट दर्शकले धेरै कुरा सिक्न सक्ने समेत दाबी गर्छन् । ‘जुनकिरी एउटा विश्वभित्र एक्लै लडिरहेकी हुन्छिन् । उसले आफ्नो जीवन अगाडि बढाइरहँदा आउने उतार चढावले जुनकिरीमाथि चुनौती थप्छ’, मिरुना थप्छिन्, ‘त्यो चुनौतीलाई डिल गर्दै जुनकिरी एकदमै दह्रो भएर अगाडि आउँछिन् । त्यो कुरा दर्शकले चलचित्र हेर्दा महसुस गर्नुहुनेछ ।’ उनले मानव जीवनमा र चरित्र निर्वाह गर्दा भोगेको समानान्तर अनुभव, अवस्था या देखिरहेको अवस्थालाई खोतलेर त्यहाँबाट प्राप्त भावनालाई आफ्नो चरित्रमा देखाउने प्रयास गरेको खुलाइन् ।

‘रङ्गेली’ अर्जुन सुवेदीको लेखन तथा निर्देशन रहेको फिल्म हो । फिल्ममा मिरुनाको अलावा दयाहाङ राई, अर्पण थापा, प्रवीण खतिवडा, रमेश बुढाथोकी, रुपेश झा, सुन्दर धिताल लगायतको प्रमुख भूमिका छ । चलचित्रका गीतहरूमा हर्क साउद, अर्जुन सुवेदी र सबिन एकतारेको शब्द रचना तथा सुशान्त गौतम र हर्कुलस बस्नेतको सङ्गीत रहेको छ । चलचित्रका कार्यकारी निर्माता जीतेन्द्र खतिवडा र अनुज जङ्ग थापा हुन् भने निर्माताहरू संसार चौलागाईं र रमेश भट्टराई वशिष्ठ रहेका छन् । युवक कार्की र शिव शङ्कर चौलागाईँ सह–निर्माता हुन् । विवेक खड्का (योलो) एशोसियट निर्माता हुन् । चलचित्र सुशन प्रजापतिले छायाङ्कन गरेका हुन् ।